Actor Jackie Chan tuanbia le a tuahmi hi rak rel ve hna

Jackie Chan Tuanbia Tawi

Jackie Chan hi kuat a thiammi le capo (nihchuak) umtu a thiammi vawleicung minthang minta (actor) a si.

Jackei Chan Cu Mizeidah A Si?

Kum 7 a si lio tein kuat, drama le tlengcung zaangleknak ( acrobatic) le hlasak cawn ai thok. Bruce Lee a chawngtu a si, tiin Hong Kong baisikup i a min a than hnu le bang in cun amah tein kuat phundang ai ser. Cu hnu cun Asia ram pumpi ah siseh, cun US tiang zongin minthang taktak ah ai chuah phah.

 

A No Lio Caan Kong

April 7, 1954 ah Hong Kong, China ah a chuak. A min hmasa cu Chan Kong-sang a si. Kum 7 te lawng a si mi Jackie Chan cu a nu le pa nih Chinese Opera Researh Institute ah cacawng dingin an chiah ta i, riantuan dingin Australia lei ah an kal tak. Kum 10 chung kuat le drama le acrobatics (tleng cung zaangleknak) le hlasak cu a hun cawn hna. A cawn lio i thitha in a tuah khawh lo caan ah heh tiah an tukvelh bal. Sikaan tangah a thangmi a si. Ahmasabik film ai zeihmi cu Big and Little Wong Tin Bar (1962) timi zetlan a si. Cu lio ah cun kum 8 te lawng a si rih i, cu rii thokin cun music lei films ah voi tamlak te ai tel kho cang.

1971 i degree a lak lio ah tlengcung zaanglek rian a hmuh pinah tihnung mi movie ah minta tuan dingin rian a hmu. Fist of Fury (1972) i Hong Kong minta Bruce Lee minta a tuannak ah ai tel ve. Cu an i zeih lio ah cun, Chinese film industry tuanbia chung vialte lakah cungsangbik in a zuang ngammi pa a rak si. Bruce Lee hrimhrim nih a rak upat ngaingai.

Hlawhtlinnak Ngan Taktak A Hmu

1973 i ruah lo tuk in Bruce Lee a thih in khan, Chan hi Hong Kong cinema ah siangpahrang bantuk a hung si cang. Bruce Lee he rian a tuanti pengmi director le producer a si mi Lo Wei he cun kungfu zetlaan pawl zeih hram a hun i thok. Asinain, ai zeih mi a tamdeuh zetlaan pawl cu hlawh a tling huaha lo i, 1970 hnu cun Wei he an hun i then beh. Cu hnu thok in cun, Bruce Lee pungsan in video i zeih kha a duh ti lo i, amah tein kuat phunphun hun ser (tawn) dingin biachahnak ai tuah. Cabuai tang.. hei ti bantuk i ai tenh le a kengruang ai khiah, ai auh ning pawl hna hi a phuahchawmmi an si i, tlengcung zaanglek ah minthang a si mi Buster Keaton nawl zong cu ai cawn pah i, a phunphun in kuat a ser. Zetlaan tha serchuah khawhnak dingah Chan nih amah tein a lam ai kawl chom.

Snake in the Eagle’s Shadow (1978) timi zetlaan hi amah duhning tein kuat a sermi cu a hun i hman i ai zeihmi a si. Kungfu hatah minta, tiin Hong Kong video zung vialte cu a hninh dih colh ko. Nihin tiang i an uar peng mi Drunken Master (1978) zong ai zeih colh. Cun The Fearless Hyena (1979), Half a Loaf of Kung Fu (1980) le The Young Master (1980) zetlaan ai zeihmi pawl nih cun a min an hun thanter chinchin cang. Bruce Lee video a zeihtu Golden Harvest he video zeih a rak i thokmi te kha a caah a sunglawi ngaingai. Caan rau lo te chungah Chan cu Hong Kong le Asia minta, mintami vialte lakah a man a faakbikmi minta a hung si. Ai zeihmi films a tamdeuh paoh hi cu amah ai tel lo nak a um huaha lo. Video chuahnak, director rian, minta rian le hlasak rian tiangin a kemhmi a tam ngaingai.

1980 awtka hrawngin khan Chan nih cun Hollywood ah i tel kho dingin thazaang a hun chuah i, tlawm tete cu a hlawh a hung tling pah khin a um. Golden Harvest nih an chuahmi The Big Brawl (1980) ah minta a tuan, asinain cu zetlaan cu a sung an paw. Cun, The Connonball Run (1982) le 1984 ah khan Burt Reynolds dirkamh in hatah rian zong a tuan chih bal.

Video Pennak

Hong Kong ah cun Chan hi a laar peng ko rih. Hatah zetlaan Project A (1983), Police Story (1985) le Armor of God (1986) pawl cu a hun i zeih hna. Cun, Mr. Canton and Lady Rose (1989) zong cu Frank Capra nih 1961 lio i A Pocketful of Miracles timi zetlaan phun in a hun i zeih. Cu lio ah cun, Chan cu minta dirhmun in a dir lawng si lo in, amah nih a ningpi in a hun tlaih dih. 1986 ah Golden Way, tiin amah tein video zeihnak rian a hun thok. Jakie’s Angels tiin minta mintami serchuaktu agency pakhat a hun dirh. Police Story an i zeih lio ah tih a nunnak zawn ah zeihmi pawl ai hliammi an tamtuk caah, “Jackie Chan Stuntmen Association” timi phu a hun dirh colh. A dirhmi video zeihnak ah ai telmi paoh cu video zeih lio i an i hliam a si ah cun, amah nih a thlop lawlaw hna. Amah zong hi video ai zeih ah hin a ruh pakhat tal cu a kiat ngawt. 1986 i Armor of God timi zetlaan ai zeih lio ah hin inndot sangpi cungin thingnge ah diving thut i khaap ai timhnak ah pee 40 sannak in a tla i a luruh a rak kuai bal.

1990 in cun a video zeihnak cu a hun thanter chinchin i, Crime Story (1993) timi zetlaan cu hlanchan bantukin a hun zeih. Cun Drunken Master le Police Story lio i a hlawhtlin bantuk tein zetlaan thatha a hun zeih khawh hna. Asinain, cu lio ah cun US ah cun a min an thei kho ruam rih lo. Asinain, 1990 laifang hrawngin khan cun American mipi tamlak nih a zetlaan pawl an hun zoh in cun minthan ai thok kho ve cang.

Hollywood Star

1995 ah khan amah tein hatah (capo) kong cauk in a chuah i, Jackei Chan’s Spartan X, ti a si. Cu nih cun Asia le US a hun cuul dih colh. Cu kum thiam ah cun, Pulp Fiction (1994) zetlaan a lartetu Quentin Tarantino nih MTV Movie Awards ah Chan cu Lifetime Achievement Award a pek. Chan nih hi laksawng hi a co lo ah cun laksawng peknak puai hi ka buaiter dih lai, tiin Tarantino nih a rak hro bal hna. Cu tluk cun Chan hi a rak uar.

Chan nih English in a tialmi tuanbia panganak a si mi Rumble in the Bronx cu 1996 ah khan New Line Cinema le Golden harvest nih an hun chuahti. Cu zetlaan a piah an thok a zarh khatnak bakah $10 million bak an hmuh colh i, box office ah pakhatnak a hun si. Cu nih cun cuhlan ai zeihmi Crime Story le Drunken Master II tiang zongin an min a thun thanter than hna.

Jackie Chan’s First Strike (1997) le Mr. Nice Guy (1998) lio ah khan cun cutluk cun a hlawh a tling lo nain, Rush Hour (1998) ah khan cun pakhatnak bak a hun hmuh than. Rush Hour ah cun, Chan cu Chinse police officer dirhmun in hatah minthang Chris Tucker he an i zeih. Chris cu Los Angeles police dirhmun in ai zeih. Cu zetlaan ah cun Chan nih amah le a mirang holh te cu a hun i hman. 2000 ah khan Shanghai Noon, timi zetlaan a hun i zeih than i, Owen Wilson le Lucy Liu he Old West ah an hun i zeih ti hna.

Cu kum thal thiam ah cun Rush Hour 2 zeih dingin Tucker cu a sawm than. Cu zetlaan ah cun Chan nih $15 million bak a miak a hmuh. 2002 ah Jnnifer Love Hewitt he The Tuxedo an i zeihti. Cu zetlaan chungah cun, a boss pa kawtangki ai hruk paoh ah power a ngei. Cu kum ah cun Hollywood Walk of Fame laksawng a hmuh i, World Stunt Awards ah best action movice award a si mi Taursu Award zong an pek.

2003 ah khan Shanghai Knights timi zetlaan in minthannak a hmu than ko nain, The Medallion (2003) le Around the World in 80 Days (2004) belte ah cun a hlawh a tling tuk lo. A video zeih rian ah chawva tamdeuh hmuh a duh caah, JCE Movies Limited cu 2004 ah hawi he an hun dirhti. Cu in cun, Hong Kong i a rak lar ngaimi a zetlaan Police Story cu New Police Story (2004) tiin a hun nolh than. Cun The Myth (2005) le Rob-B-Hood (2006) zong a hun i zeih.

 

Nai Kum Hrawmghrang Chungah

2007 ah khan Rush Hour 3 a hun i zeih than. 2008 ah khan Master Monkey zetlaan ah amah aw a hun hman. Cu zetlaan cu Kung Fu Panda in kahtuun in an hun zeih. Cu zeitlaan cu video game le TV zongah tamlak an hman. Cu kum ah cun, a Chinese minta hawi Jet Li he an i kawp i The Forbidden Kingdom, timi zetlaan an hun i zeihti. Cu tlawmpal ah cun The Spy Next Door (2010) le nawlnolh in ai zeihmi the Karate Kid (2010) zetlaan pahnih cu US ah a hun i zeih colh.

Tulio cu Chinese cinema rian ah suttung bangin a dirkamtu a si. Shinjuku Incident timi zetlaan cu 2009 ah khan ai zeih i, 2010 ah khan Little Big Soldier timi zetlaan a tuanbia a tial i, minta zong a tuan beh. 2011 ah khan, 1911 lio tuanbia kong an zeihmi ah co-director a tuan pah in minta zong a si chih.

CZ12 (2012) zetlaan ah action a hun i zeih than i, Police Story 2013 timi zetlaan a hun ser than. 3-D movie in Dragon Blade timi zong 2015 ah a hun i zeih i, a hlawh a tling ngaingai. Cu zeitlaan ah cun American minthang minta John Cusack le Adrien Brody zong an i tel kho i, cu in cun Skiptrace le Railroad Tigers timi zetlaan pawl zong cu 2016 ah a hun suaisam hna.

A fapa kong

Chan hi dawtnak le zaangfahnak a ngei ngaimi pa a si i, saram himbawmnak le kokek puicimhnak chanhchuahnak rian ai hmaithlaktu a si. Ka thih tikah ka ngeihmi a zatceu hi harsa bomhnak ah ka thawh dih te lai, tiah 2006 ah khan a chim bal. UNICEF Goodwill Ambassador rian zong 2004 tein khan a tuan i, 2015 ah khan Singapore first anti-drug ambassador rian an pek.

1982 ah khan Taiwan mintami Lin Feng-jiao a thit i fapa pakhat te an ngei. A fapa zong cu minta le hlasakthiam a si. A min cu Jaycee a si. Cun, Miss Asia a hmu balmi he zong innlak ah fanu pakhat te a ngei.Credit:chelseabawi