Virus le Floyd thahnak ruangah Trump cu 2020 thimnak ah a sungh ding aa fiang ngai cang

Trump Caah Zaan Mangchia Atlung Chin Lengmang Cang

ABC News/Washington Post nih an tuahmi nehnungbik poll (vote relnak) ningah, Joe Biden nih President Trump cu 10-point in hmai a fon kanh (lead). Asinain, Biden vote a petu hna lakah hnarcheu hrawng hi cu tuantein amah vote pek ding ai fiang cia mi hna an si.

US economy a tlaktuk mi ruangah le coronavirus a tawlrel ai palhmi kong i an thang an chiat ruangah Trump a dirhmun hi thangchiat a tong ngingai cang. A sermi rian vialte cu rili tawne ah an i dup dih cang i, American minung vialte lakin 45-53% lawng nih rian kongah approve (cohlannak) an tuah cang i, March dih lei sang khan cun disapproval (cohlan lo) an tuahmi hi 7 point tiang a hung kai cang.

 

Trump nih pulrai a tawlrel ning kong he pehtlaiin poll an tuah tikah, 46-53% lawng mark a hmu i, a liamcia thla 2 in khan cun, a dirkamhtu lakin 5% a hung zor i, a duhlotu hi 8% tiang a hung kai. Harsatnak ton lio i a cawlcanghnak a cohlangtu hna an miluzat hi a cohlang lo tu hna an miluzat nih 15 point tiangin a hun thlau cang. 43 vs 28% a si.

 

ABC caah Langer Research Associates nih poll an tuah mi zongah cun Trump cu a lar ruam ti lo. Puitling lakin 42% nih hin Trump hi buaktlakin an duhnak an langhter i, 46% nih Biden hi an uar deuh ve. Mi tamdeuh nih cun Trump hi an uar ti lem lo i, 55% vs 48 tiin Biden mark an pek cang. Pumpaak an sining zongah Trump a mark hi a niamdeuh ngaingai. Minung 10 ah 6 nih cun Trump hi miding le zumawktlakmi ah cun an hmu kho ti lo. Zapizaraan American mipi kan harnak zong a theithiam kho lo i, a thintawi ning le a bultan ning hi a rian he ai tlak ruam lo, tiin an hmuh.

50% nih cun Trump hi a thawngtha mi hruaitu a si ko, tiin an hmuh ko rih i, kan hnung kum fall lion akin khan 6 point tiang a mark a hung kai vurmar. Biden cu 43% lawng mark a rak hmu. US economy hi a dirhmun a hung chiakha ngaingai ko nain, economy tawlrel kongah Trump hi 52%
mark a rak hmu i, March lio bakah 5 point cu a tla colh ve. Economy a tawlrel ning a duhlotu 6 point tiang an kai ve i, 44% tiang a phan diam manh ve.

 

 

Federal cozah nih coronavirus a kham khawhnak dingah cun Trump nakin Biden nih mi a hruai khawh deuh lai, tiin an zumh caah 50-42% tiin mark an pek hna. US economy a khel a hun i leh than khawhnak ding kong belte ah cun amah pahnih an mark ai tluk – 47-47% veve an hmu. Asinain, tu lio hrawngah cun economy kong nakin virus khamnak kong hi mipi nih an i hmaithlak deuhmi thil a si cang.

Economy le COVID-19

US economy dirhmun hi November election tik i Trump a tlak te lainak tlakkhur bantuk a si. Bloomberg nih survey a tuah ningah, US economy dirhmun a tha ko, tiin a chimtu American mipi an miluzat cu March in khan cun 69% in 34% tiang an hung zor vurmar. Kan economy a dirhmun a tha ko, tiah a titu registered voters lakah 73% nih Trump an tanh. A tha tal lo cu, tiah a titu lakin 70% nih Biden an hun dirpi ve.

 

Economy dirhmun hi vote kongah hmunhma a la ngai ding a si. Miphun tlawm pawl le, zumhnak lei a tanhmi pawl le fekthup in mah ruahnak ai tlaih peng a hmangmi hna nih cun Trump hi an dirpi deuh ve lai. Cun, coronavirus kong zong hi tutan vote thlaknak kongah hmunhma a lak ngai ding a si ve rih.

US ram chung county pawl hi tiaceu tein phu 4 in an i then. Coronavirus nih a tlunhbikmi county le a tlunh lo bikmi county, tiin an i then. Virus a tlunnak bik (a phukhatnak) county ah cun Biden nih Trump hi 72-24% tlukin a tei. A phuhnihnak county ah Biden nih 62-35% tlukin Trump a tei. A phuthumnak county ah Trump nih Biden cu 53-41% in a tei ve i, a phulinak (virus a tlawmnakbik) county ah cun Trump nih Biden cu 60-38% in a tei.

Cu nih a langhtermi cu, Virus nih a tlunhbikmi khua pawl hi Democrats an tamnakbik a si i, virus nih a tlunh lonak deuh khua ah Republican an tam, tinak a si. Coronavurs he pehtlaiin country kipah vote pek an duhdeuhmi an i thim cang, titluk hi a si.

Vote Preference

Buaktlak in chim ah cun, president i cuhnak ah Biden nih Trump hi 53-40% in puitling vote thlatu lakah a tei i, vote pek dingin min kai pe ko cang, tiin a chimtu hna lakin Biden nih 53-43% in Trump a tei. Vote pek dingin min zong kan pek cang i, vote pek tengteng ding zong in kan i tim, tiah a titu hna lakin Biden nih Trump cu 51-46% in a tei. Nikum in a tutiang ah tutan hi Biden a mark a thatbik a si.

Nai thla 2 chung i Biden nih teinak a hmuhmi a tamdeuh hi cu mah le lungtho tein vote a thlatu, party kong a buai theng lo mi pawl le minonal nu pawl an si hna. Asinain, zapi theih a si bangin, thil i hmaithlak a herhnak kongah le thathawhnak kongah zapi lungton ai harh ngai ve.

Trump dirpi dingin ai tim cangmi hna lakin 87% nih hin cun tuchun hmanh ah thimnak tuah hna sehlaw Trump hi vote kan pek ko lai, tiin an chim ngam bak ve. Biden a dirpi tu pawl lakin 74% nih cu bangin an chim ve. Hi kongah cun Trump nih a siak deuh ve. Cucu, a liamcia kum 4 lio i Hillary Clinton a dirhmun bantuk te kha a si.

Minpek tein Trump vote a petu hna lakin 69% hi cu thathotein vote a pemi an si. Biden vote a petu lakin thathotein vote a petu hi 34% an si ve i, cu kongah cun 2-1 tlukin Trump nih a hun tei ve. Cu lungthawhnak cu a biapi ngaingai mi a si. Zeicahtiah, lungthawhnak nih hin midang zong vote pe dingin a sawm khawh hna.

 

 

Sen. Bernei Sanders a rak dirkamhtu Democrats pawl le Biden a tanhtu Democrats pawl, tiin an i then. Trump tanhnak cha in cun, tiin Biden a hun tanhmi ko khi an lo. Cucaah, November thimnak ah Biden ka dirpi hrimhrim lai, tiin Biden kongah a tha a thomi an um huaha lo.

Mail In Maw Na Kuat Lai?

Vote thlaknak pung tiang minung va kal hau lem lo in, mail in vote pek ah a thadeuh lai, tiah a titu hi 65-30% tluk an si cang. Cu ti vote thlak a duhmi hna hi 49% an si i, a duh lo tu hi 24% an si ve.

Mail in vote pek onh tawn ningnak kau deuh in kutkaa kan on lo ah a tha, zeicahtiah vote deu tampi ai tel kho i, cu ti hna i a si taktak le bangah cun kan Republican Party kan lo ko lai, tiah Trump nih a duhlonak a langhter. Vote thlaknak hmun a phan kho ve lo mi (lai hlumh lo ruangah) asiloah mail in vote kuatnak kutka cuhlannak kaudeuh in on a duhmi hi Republican lak hmanh in 33% lawng an si i, party tanh lem lo pawl lakin 67%, cun Democrats lakin 87% an si hna.

Groups

Groups lakah cun Biden nih Trump hi 56-39% in a tei. Hi hna hi president thimnak kongah hmual a ngei ngaimi an si tawn zungzal. Nu le pa karlak zongah Trump le Biden an dirhmun ai khat lem lo. Trump a dirpitu vialte lakin 52% hi pa an si i, 44% hi nunau an si. Biden thantu lakin cun 62% hi nunau an si i, pa cu 34% lawng an si.

Biden a thanhtu lakin kumno nunau pawl (kum 18-44) hi 72% an si i, March in khan cun Trump a thanhtu nunau lakin kum 18-44 karlak minung hi 54% an si ve.

Miphun hmemi pawl karlak an pahnih dirhmn hi a biapi ngaingai fawn rih. Trump nih Biden hi 53-44% in a tei. Minak lakin 89% nih Biden an dirhpi i, Hispanics lakin 69% nih an dirpi ve.
Miphun hmemi hna nih hin president i thimnak lai an rel khawh ngai ve i, 1976 ah khan cun 10% an i tonenh nain, 2016 in khan cun 29% tiang an hun i tonenh khawh cang.

Pulrai a tlun hnu in rian ai dinmi (laid off) American mipi lakah 66% nih Biden an dirpi i, Trump cu 30% lawng nih an dirpi. Cu hna lak i a tamdeuh hi cu nunau hi miphun hme pawl an si khun hna.
2016 i Electoral College kong theih a si cang bangin, a biapi ngaimi thil pakhat a taang rih mi cu, states vialte sinah zeitindah vote kan phawt lai, timi hi a si. 2016 lio i Clinton nih buan a rak conak blue state pawl ah hin Biden nih 65-32% in Trump a tei. 2016 lio national popular vote a sungh bu zong in president thutdanh cohnak dingah Trump nih vote a rak hmuhnak red state pawl ah cun Trump nih Biden cu 51-44% in a tei ve.

An Nuncan Kongah

Trump hi nuhrin sinak in milung hak a si i, a dir a fakmi pa a si. Buaktlakin cu Biden hi mitha deuh cu a si ko. Dinfelnak le zumhawktlakmi sinak kongah Biden nih Trump cu 48-35% in a tei. A minung hawi an sining a theihthiampiak maw piak lo, timi kongah Biden nih Trump cu 45-38% in a tei.

Umtu hawiher, biachim kamphawh le ingai tha le tha lo kongah Biden nih Trump cu 53-38% in a tei. “Mi ngupa Joe” (sleepy Joe Biden( tiin Trump nih a auhmi pa Biden nih thluak that kongah Trump cu 51-46% in a tei.

A cunglei kan langhtermi biachim kamphawh kongah hin Trump hi a mark a tla chinchin cang i, president office a thut hnu in 50% tiang a mark a tla cang, ti si. Biachim kamphawh i sumlo dirhmun he pehtiain in Truman administration hnu in US president vialte lakah a dirhmun a niambikmi a si. Biden nih cun le a dirpitu hna an tha a thawhter kho fawn tung hna lo tikah, Trump a dirthawmnak hi a hun i chirhkanhnak ah a hun i hman kho ngai hnga maw hi, timi biahalnak tampi a um ve.

Note: Tutan ABC News/Washington Post poll an tuah mi hi landline le telephone in May 25-28, 2020 ah an tuah mi a si i, lakhruakin puitling minung 1,001 sinin English le Spanish holh in an lakmi a si. An lakmi cazin ah hin ai palhnak hi 3.5 points tiang cu a um ve ko. Democrats-Republicans-independents pawl, tiin a mi then in (31-24-37) poll an tuahmi hna a si.

Suvey hi cu ABCE News caah Langer Research Associates of New York nih an chuahmi a si i, sampel le data hi cu Abt Associates of Rockville, Md nih an tuahmi a si.credit:cheseabawi