Donald Trump tlaih dingin Iran Cozah nih Interpol a nawlmi cu a cohlan piak loh

June 30

US President tlaih dingin Iran Cozah nih Interpol sinah nawlnak a tuah nain a cohlan piak loh. 2020 January 3 ah US President Trump nih Iran ralbawi Soleimani a rak thah caah tlaih dingin Interpol sinah bawmhnak a hal hi asi.

 

US President Donald Trump cu tlaih dingin Iran Cozah nih nawl a chuah. Iran Cozah nih Interpol sin zongah bawmhnak a hal hna. (Interpol timi cu vawlei ramkip i palik i komhnak bu pakhat asi)

 

Aluancia January 3 ah Iran ralbawi Soleimani cu Iraq a tlawnnak ah US President Trump nawlnak in thah a rak si. Thla 6 hnu ah tubantukin Iran nih Trump tlaih dingin nawl a chuah hi asi.


(Trump nawl peknak in thahmi Iran bawi Soleimani)

Iran Cozah nih Trump tlaihnak dingin Interpol sinah bawmhnak a halmi cu Interpol nih a cohlan piak loh.

 

“US President Trump tlaih dingin Iran nih bawmh halmi hi Interpol zulhphung he aa ralchanhmi asi. Upadi buar in a zaammi lawng Interpol nih tlaih khawh asi” tiin Interpol nih a cohlan lonak a langhter.

 

 

Ramkhel buainak, miphun buainak, biaknak buainak le ramkhat le ramkhat kar lak buainak kongah Interpol nih tlahnak nawl kan ngei loh ti zong an zulhphung a langhter.

 

Daily Mail