Ralkap nih Uknak an laaknak ruang phun (7)

Ralkap nih Uknak an laaknak ruang phun (7)
_____________________________________________

2020 thimnak ah hrokhrawlnak/hlennak a tam tuk caah uknak kan laaknak asi tiin ralkap nih an chim nain zumh asi loh. Ralkap nih uknak an laaknak ruang hi phun 7 in langhter ka langhter lai.

1. Ralkap nih “Ziknawh dohnak Phu” an duh loh
_____________________________________________

Aung San Suu Kyi hruaimi NLD Cozah tuahmi “Ziknawh dohnak Phu” hi ralkap nih an ttih tukmi le an duh lo tukmi phu pakhat asi. Myanmar ramchungah ziknawh dohnak hi NLD nih biatak tein a kal pi caah ralkap pawl an thin a phang ngai. Ralkap nih a hman lomi thil tampi an rak tuah caah Ziknawh dohnak phu hi a ttihnak le a duh lonak asi. Ralkap sualnak kha mipi sinah langhter ding asi cang i, ralkap nih an sualnak thuh an duh caah uknak an laaknak asi kho mi asi.

2. Ralkap nih 2008 Phunghrampi kilven peng an duh
_____________________________________________

Ralkap pawl an i vennak 2008 Phunghrampi hi Aung San Suu Kyi nih 21st Panglong Confernce hnatlaknak in hrawh a timhmi/duhmi asi. 2008 Phunghrampi kongah Suu Kyi duhnak le ralkap duhnak aa ralchanh taktak mi asi. NLD Cozah lioah MPs hna nih Pyidaungsu Hluttaw ah 2008 Phunghrampi remh dingin an rak i zuam nain hlawhtlinnak a rak um loh. Nain, 21st Panglong hnatlaknak in 2008 Phunghranpi hi NLD Cozah nih hrawh timh caah ralkap nih an duh lo tukmi asi.

3. Ralkap nih 2020 thimnak result an cohlang kho lo
_____________________________________________

2020 thimnak ah NLD Party nih Pyidaungsu Hluttaw ah Vote 396 in teinak an rak hmuh. Ralkap he aa pehtlai ngaimi USDP nih 33 lawng an rak hmuh. Pyidaungsu Hluttaw ah ralkap MPs hi 166 ansi i; USDP he fonh ahcun 199 ansi. Hluttaw chungah Ralkap+USDP biatung cu a sung peng ding dirhmun asi cang. Kum 5 chung Ralkap+USDP MPs pawl hi Hluttaw chungah hmunhma a ngei kho ding ansi ti loh. Meeting kai sawhsawh ding dirhmun an phanh caah Vote result hi an cohlang kho lonak asi.

4. Ralkap hruaitu Gen. Min Aung Hlaing nih President tuan a duh.
_____________________________________________

2020 thimnak tuah hlan ah Gen. Min Aung Hlaing nih Myanmar President tuan a duhnak cu Rusia Media pawl sinah Indirect in a rak chim bal. 2020 thimnak result ruangah Min Aung Hlaing hi President a chuak kho ding asi ti loh; Vice President lawng a tuan kho ding asi. President tuan a duh nain Vice President lawng a tuan kho ding asi cang caah uknak a laaknak hi asi kho mi asi.

5. Ralkap hruaitu Gen. Min Aung Hlaing nih nawlngeihnak a duh peng
_____________________________________________

Min Aung Hlaing hi 3 July 2021 ah kum 65 asi cang caah Pension lakter ding asi. Nain, uknak a laak caah Pension lak lo dingin phung thar a tuah. Min Aung Hlaing hi Pension rian in aa dinh awk asi nain Pension a la duh loh. A tuah sernak zoh tikah nawlngeihnak a duh pengmi asi.

6. ThanShwe biakamhmi a tling kho loh
_____________________________________________

Ralkap lutlai hlun ThanShwe biakamhmi a tlin khawh lo caah ralkap nih uknak an laak tiin zumh asi. ThanShwe nih President hlun TheinSein, Speaker hlun ShweMann le Gen. Min Aung Hlaing hi “President” tuanter dingin bia a rak kamh hna tiin theih a rak si. 2010 thimnak ah USDP nih teinak an rak hmuh i; Thein Sein hi President tuanter a rak si i; Shwe Mann hi Speaker tuanter a rak si. Min Aung Hlaing zong General rian pek a rak si. 2015 thimnak ah NLD Party nih teinak an hmuh caah Shwe Mann le Min Aung Hlaing cu President an rak si kho loh. 2020 thimnak zongah NLD nih fak tuk in teinak a hmuh than caah ThanShwe biakamhnak cu a tling kho ti loh.

7. Ralkap nih mipi le ramdawtnak an ngeih lo caah uknak an laak
_____________________________________________

Myanmar ramchung thilchuakmi a that tuk caah ram dawtnak le mipi dawtnak an ngeih lo caah ralkap nih uknak an laaknak hi asi. “Ralbawi hlun pawl nih mipi le ram an dawt lo caah ralkap nih a tha tukmi Myanmar hi an hrawh” tiin Singapore a rak sersiamtu Prime Minister hlun Lee Kuan Yew nih ralbawi hlun pawl sual a rak phawt bal. Myanmar hi ram tha asi caah mipi dawtnak le ramdawtnak an ngeih lo caah Ralkap nih Uknak an laak lengmang nak asi.

 

Vawlei cungah ralkap uknak a sau bikmi hi “Myanmar” asi.

47 Comments

Leave a Reply

Your email address will not be published.


*